Wednesday, June 13, 2007

300.அதனால்தான் சூப்பர் ஸ்டார்

1992ம் வருடம் ரஜினியின் கார் சென்னை ராதாகிருஷ்ணன் சாலையில் சென்று கொண்டிருந்தது. அப்போது திடீரென ஒரு போலிஸ் ஜீப் ரஜினியின் காரை ஓவெர்டேக் செய்து, ரஜினியின் காரை நிற்கும்படி சிக்னல் செய்தது.

"முதல்வரின் கார் போகும்வரை இங்கு டிஃராபிக் நிறுத்தப்படுகிறது. ஓரம் கட்டி நில்லுங்கள்" என ரஜினியை எச்சரிக்கை செய்தார் போலிஸ் அதிகாரி.1991 - 1996ல் ஜெயலலிதா முதல்வராக இருந்தபோது மணிக்கணக்கில் டிராஃபிக்கை நிறுத்துவது சென்னை போலிஸின் வழக்கம்.

ஒன்றும் பேசாமல் காரை ஓரம் கட்டி நிறுத்திவிட்டு கீழே இறங்கினார் சூப்பர் ஸ்டார். ரோட்டோரமாக இருந்த பெட்டி கடை ஒன்றுக்கு நடந்து போனார். ஒரு பாக்கட் சிகரெட்டை வாங்கி, ஒரு சிகரெட்டை உருவி புகைபிடிக்க துவங்கினார்.

சூப்பர்ஸ்டாரை சுற்றி கூட்டம் சேர துவங்கியது. விரைவில் அந்த ஏரியாவே ஸ்தம்பித்து போனது. எங்கெங்கிருந்தோ எல்லாம் மக்கள் வெள்ளம் சூப்பர் ஸ்டாரை காண ஓடி வந்தது. ராதா கிருஷ்ணன் சாலையே ஜாம் ஆகி, முதல்வரின் கார் மட்டுமல்ல, ஈ, காக்கா கூட நுழைய முடியாத அளவு கூட்டம் கூடியது.

கூட்டத்தை விலக்கிகொண்டு போலிஸ் அதிகாரிகள் ஓடி வந்தனர். "முதல்வர் அவரது வீட்டை விட்டு கூட கிளம்ப முடியாமல் இருக்கிறார். தயவு செய்து நீங்கள் வீட்டுக்கு போங்கள்." என கெஞ்சினர் போலிசார்.

"முதல்வர் போகட்டும். நான் வெயிட் செய்கிறேன். வெயிட் செய்வதில் எனக்கு எந்த சிரமுமில்லை" என்றார் தளபதி.

'அய்யா சாமி' என்று கெஞ்சி கூத்தாடி அவரை காரில் ஏற்றி வழி அனுப்பி வைத்தது போலிஸ்.அவர் அங்கிருந்து கிளம்பும் வரை அம்மா தனது வீட்டை விட்டு நகர முடியாமல் இருந்தார்.

'தமிழ்நாட்டுக்கு முதல்வர் நீயாக இருக்கலாம், மக்கள் மனதில் என்றும் இருப்பது நானே' என்பதை அம்மாவுக்கு சூப்பர்ஸ்டார் உணர்த்திய சம்பவம் இது.

அதனால்தான் அவர் சூப்பர் ஸ்டார்.

நன்றி: பாலிவுட் நியூஸ், மற்றும் திரு கேபிடல்

Post a Comment