Tuesday, January 09, 2007

224.கடவுளை கண்டவர்கள்

1998 முதல் 2003 வரை உள்ள காலகட்டத்தில் மட்டும் இந்தியாவில் ஒரு லட்சம் விவசாயிகள் தற்கொலை செய்து கொண்டிருக்கிறார்கள்.கடந்த பத்தாண்டுகளில் ஆந்திரா மாநிலம் அனந்தபூரில் தற்கொலை செய்துகொண்ட விவசாயிகள் எண்ணிக்கை மட்டும் 758.கடு ம் வறட்சி, விளைபொருளுக்கு போதிய விலை கிடைக்காமை, சாகுபடி தோல்வி என சிக்கித்தவித்த அனந்தபூர் விவசாயிகளுக்கு உதவ தன்னார்வலர்கள் துவக்கிய டிம்பக்டூ எனும் இயக்கம் இன்று அந்த விவசாயிகளின் முகத்தில் மலர்ச்சியை ஏற்படுத்திக் கொண்டிருக்கிறது.

உலக அளவில் ஆர்கானிக் விவசாயம் என்பது பிரபலமாகி வருகிறது.ஆர்கானிக் விவசாயம் என்பது செயற்கையான உரம்,பூச்சிக்கொல்லி என எதையும் பயன்படுத்தாமல் இயற்கை முறையில் பயிர் செய்யப்பட்ட காய்கறிகள், பொருட்கள் ஆகியவற்றை குறிப்பதாகும்.இந்த வகை இயற்கை விவசாயம் வாடிக்கையாளருக்கு நன்மையையும், விவசாயிகளுக்கு அதிக வருமானத்தையும் தரக்கூடியது.டிம்பக்டு இந்த இயற்கை விவசாயத்தை பயன்படுத்தி அனந்தபூர் வரட்சிக்கு உதவ முன்வந்தது.

2005ல் 27 விவசாயிகள், 80 ஏக்ரா நிலம், 1 கிராமம் என்ற அளவில் துவங்கிய இந்த முயற்சி இப்போது 8 கிராமங்கள், 480 ஏக்ரா, 160 விவசாயிகள் என்ற அளவில் விரிந்துள்ளது.விவசாயிகளின் வருமானத்தை அதிகரிப்பது எனும் நோக்கில் செயல்படும் டிம்பக்டூ, விவசாயிகளின் பொருட்களை அவர்களே விற்று பயனடைய ஒரு கூட்டுறவு நிறுவனத்தையும் துவக்கி உள்ளது.119 கிராமங்களில் 8000 பேர் இந்த சங்கத்தின் மூலம் பயனடைந்து வருகின்றனர்.

அனந்தபூர் விவசாயிகள் நிலக்கடலையை மற்றும் பயிரிட்டு ஏமாந்து வந்தனர்.அவர்களுக்கு மில்லட்(தமிழில் ராகி(கம்பு) என நினைக்கிறேன்.சரியா என சொல்லவும்) எனும் தானியத்தை மாற்றாக டிம்பக்டூ அறிமுகப்படுத்தியது.மில்லட்டுக்கு அதிக நீர் தேவை இல்லை.சர்க்கரை நோயை குறைக்க கூடியது என பல நன்மைகள் உண்டு.ஆனால் வாடிக்கையாளர்கள் மத்தியில் இதற்கான விழிப்புணர்வு குறைவு என்பதால் மில்லட்டை நல்ல ஒரு மாற்று தானியமாக வாடிக்கையாளர் மத்தியில் பிரபலப்படுத்த டிம்பக்டூ முயற்சி செய்து வருகிறது. பல உணவு திருவிழாக்கள், விழிப்புணர்வு முகாம்கள் எனவும் நடத்தி வருகிறது டிம்பக்டூ. மும்பை, பெங்களூர், சென்னை என பல பெருநகரங்களில் இந்த இயற்கை பொருட்களுக்கு நல்ல சந்தையை டிம்பக்டூ ஏற்படுத்தி இருக்கிறது.

டிம்பக்டூவும் தண்ணீர் நிர்வாகமும்:

அனந்தபூரில் கடும் வரட்சி நிலவுவதால் நீர் மேலாண்மைக்கு டிம்பக்டூ அருமையான பங்காற்றியுள்ளது. டிம்பக்டூ முயற்சியால் அனந்தபூரில் ஆந்திர அரசின் வேலைக்கு உணவு எனும் திட்டத்தின் 37,728 மழைதண்ணீர் சேகரிப்பு குழிகளும், 13,000 மரங்களும் நடப்பட்டன. நூற்றுக்கணக்கான ஏரிகளும் சுத்தம் செய்யப்பட்டு தூர்வாரப்பட்டன.இதனால் அந்த ஏரியாவில் விளைபொருள் உற்பத்தி ஏக்ராவுக்கு 5 முதல் 10 சாக்குமூட்டைகள் என்ற விகிதத்தில் அதிகரித்துள்ளதாம்.

அதுபோக டிம்பக்டூ செய்த மற்ற சேவைகள்

புல் வளர்க்கும் திட்டம் மூலம் 23 கிராமங்களில் உள்ள 40,000 ஆடுகளுக்கு புல் வழங்கியது.

ஆயிரக்கணக்கான் மரங்களை நட்டது

சின்ன கல்லணைகளை கட்டியது.

8000 ஏக்ரா நிலத்தில் மரம் நட்டு வனவளத்தை பெருக்கியது.

7800 புளியமரங்களை அமைத்து விவசாய வருமானத்தை அதிகரித்தது.

சொசைட்டி அமைத்து மக்களின் முதலீட்டுக்கு நல்ல வட்டியை (9%) அளிப்பது.

அனந்தபூரில் உள்ள சென்னகொத்தபள்ளி கிராமத்தில் உள்ள படித்த இளைஞர்கள் தமது கல்வியை வைத்து தாங்கள் மட்டும் பிழைக்காமல், தங்கள் மாவட்ட மக்கள் அனைவரும் பயனுற துவக்கிய இயக்கமே டிம்பக்டூ.நாடு என்ன செய்தது எனக்கு என இந்த இளைஞர்கள் கேட்கவில்லை.நான் என்ன செய்தேன் நாட்டுக்கு என்று கேட்டார்கள்.

விளைவு........

ஏழையின் சிரிப்பு.அதில் இறைவனின் தரிசனம்.

ஆம்..இந்த இயக்கத்தினர் கடவுளை கண்டவர்கள்.

நீங்களும் கடவுளை காணவேண்டுமா?

அதற்கு டிம்பக்டூவுக்கு நீங்கள் உதவ வேண்டும். பணமாக மட்டும் அல்லாமல் எளிய உதவிகளும் செய்யலாம்.இதோ இந்த சுட்டியை அழுத்துங்கள். அத்துடன் இந்த செய்தியை உங்கள் நண்பர்களுக்கு பரப்புங்கள்.

Post a Comment