Monday, October 23, 2006

204. நான்

70களில் வந்த வண்ணப்படம் என நினைக்கிறேன். ரவிச்சந்திரன் நடித்ததில் காதலிக்க நேரமில்லைக்கு அடுத்து மிக கலக்கலான வெற்றியை பெற்ற படம். ஜமீந்தார் ஒருவரின் சிறுவயது மகன். தந்தையுடன் கோபித்துக்கொண்டு வீட்டை விட்டு இலங்கைக்கு ஓடிவிடுகிறான். சொத்து முழுவதும் அவன் பெயரில் எழுதி வைத்து விட்டு, அவனை கண்டுபிடிக்க என்னெத்தே கன்னையா, விகே ராமசாமி தலைமையில் ஒரு குழுவையும் ஏற்படுத்தி விட்டு ஜமீந்தார் மண்டையை போடுகிறார். வழக்கம் போல் ஜமிந்தார் மகனுக்காக காத்திருக்கும் அத்தை மகள் ஒருவர்(வேறு யார்?நம்ம புரட்சி தலைவி அம்மா தான்:-) குழு அவனை கண்டுபிடிக்க புத்திசாலித்தனமாக ஒரு காரியம் செய்கிறது. வீட்டுக்கு வெளியே காலிங்க்பெல் வைக்கிறது. ஜமீன் வாரிசு வந்து மணி அடித்தால் பச்சை விளக்கு எரியும். அப்புறம் அவனுக்கு இன்டர்வியு வைத்து அவன் தான் வாரிசா என சோதிப்பார்கள். வாரிசு யார் என கண்டுபிடிப்பது எப்படி? அவனுக்கு இடது கை பழக்கம், காலை மிதித்தால் "அம்மா" என கத்த மாட்டான் "அப்பா" என்று தான் கத்துவான். ரோஜா கலர் தான் பிடிக்கும். இந்த க்ளூக்களை வைத்து உண்மையான வாரிசை கண்டுபிடிக்கணும்.:-) "நான் தான் வாரிசு" என சொல்லிகொண்டு மூணு பேர் வந்து நிற்கிறார்கள். நாகேஷ், மனோகர் மற்றும் ரவிச்சந்திரன். மூவரும் அனைத்து சோதனைகளையும் பாஸ் செய்கிறார்கள். குழு திக்கு முக்காடி போய் மூவரையும் அரண்மணையில் இருக்க வைத்து பரிசோதிக்கலாம என நினைக்கிறது. மனோகரை ஆதரித்து கடத்தல் மன்னன் அசோகனின் கும்பல் நாகேஷயும், ரவிச்சந்திரனையும் மிரட்டுகிறது. இருவரும் கூட்டணி போட்டு அசோகனை சமாளிக்கும் காட்சிகள் காமடியின் உச்சகட்டம். இருவரையும் கடத்தி சிறைவைக்க, சினிமா ஆசை காட்டி அடியாள் பெண்களை மயக்கி தப்புவது செம காமடி. நடுவே ஜெயலலிதாவுக்கும் ரவிச்சந்திரனுக்கும் லவ்ஸ் வேறு மலர்கிறது. ரவிச்சந்திரன் தான் உண்மையான வாரிசு என அனைவரும் நம்ப துவங்கையில் ரவிச்கந்திரனின் தங்கையும், தாயும் இலங்கையிலிருந்து வர அவர் குட்டு உடைகிறது. நாகேஷை யாரோ கடத்திக்கொண்டு போக போட்டியின்றி மனோகர் தேர்ந்தெடுக்கப்படும் சூழலில் மீண்டும் பச்சை விளக்கு எரிந்து "நான் தான் வாரிசு" என்று சொல்லிக்கொண்டு முத்துராமன் வந்து நிற்கிறார். முத்துராமனையும் சதி செய்து மனோகர் துரத்துகிறார். கடத்தப்பட்ட நாகேஷ் தப்புகிறார். அவரும் முத்துராமனும் ரவிச்சந்திரனும் மனோகரை துரத்த கூட்டு சேர்கின்றனர். அதன்பின் ஜெட் வேகத்தில் கதை பறக்கிறது. படத்தின் புதிர் முடிச்சுகள் ஒவ்வொன்றாக அவிழ்கின்றன. படத்தின் சிறப்பம்சங்கள்: ஜமிந்தாரின் சிறுவயது மகள் குட்டி பத்மினியை அசோகன் கொல்ல முயல அருவிக்கரையில் நாகேஷ் 'நான் ஆனையிட்டால்" என்று பாடி காப்பாற்றும் காட்சிகள் அமர்க்களமான காமடி. படத்தின் ஆரம்பத்தில் ஜெயலலிதாவை கிண்டல் அடித்து ரவிச்கந்திரன் பாடும் "ராஜா..கண்ணு போகாதடி..நீ போனா நெஞ்சுக்கு ஆகாதடி" என்ற பாடல் வெகு பிரபலம். ஜெயலலிதாவை பெண்பார்க்க வருவோரை அடித்து விரட்ட "அம்மனோ, சாமியோ" என பேயாட்டம் ஆடுவது குலுங்கி சிரிக்க வைக்கும் காமடி. அந்த பாட்டும் வெகு பிரபலம். அசோகனை காமடி கலந்த முட்டாள் வில்லனாக காட்டியிருப்பது சிறப்பு. அசோகனின் டயலாக்குகள் வெகு பிரமாதம். கிளைமேக்சில் விஷவாயு அறை, கார்சேசிங், இரும்பு கிளவுஸில் கூரிய நகம் மாட்டிக்கொண்டு பாயும் வில்லன், கிளவுசில் மின்சாரம் பாய்ச்சி கொல்லும் கதாநாயகன்,சிறுவயதிலேயே தன் ஏழை நண்பர்களை அரண்மனைக்கு கூட்டி வந்து விருந்தளித்து அதற்காக ஜமீந்தார் அப்பாவிடம் திட்டு வாங்கி வீட்டை விட்டு ஓடும் வயதுக்கு மீறிய சிந்தனையுள்ள சிறுவன் என பீரியட் பிலிஸ்ம்களுக்குண்டான அனைத்து மசாலாக்களும் உண்டு. என்னத்தே கன்னையாவுக்கு அந்த பெயர் வர இந்த படம் தான் காரணம். அடிக்கடி "என்னத்தே வந்து,, என்னத்தே போயி" என சொல்லுவார். நாகேஷ் இரட்டை வேஷம். நாகேஷின் அம்மாவும் இன்னொரு நாகேஷ் தான். அடிக்கடி 'கொமட்ல குத்துவேன்' என சொல்லி சிரிக்க வைப்பார் மொத்தத்தில் படம் பார்த்தால் வயிறு குலுங்க சிரிக்கலாம் என்பது உறுதி
Post a Comment